Minn tratturi b’sewqan awtonomu għal robots tal-IA: Inrawmu spazji tax-xogħol tajbin għas-saħħa fl-UE

From self-driving tractors to AI robots: Fostering healthy workspaces in the EU

Fl-era diġitali, aktar u aktar kumpaniji fl-Ewropa kollha qed jimplimentaw soluzzjonijiet effettivi u prattiċi biex itejbu s-sigurtà u s-saħħa tal-ħaddiema. L-isforzi tagħhom qed jistabbilixxu standards ġodda għall-postijiet tax-xogħol.

L-Aġenzija Ewropea għas-Sigurtà u s-Saħħa fuq il-Post tax-Xogħol – l-aġenzija tal-informazzjoni tal-UE għas-saħħa u s-sigurtà fuq il-post tax-xogħol (OSH) – irrikonoxxiet sitt organizzazzjonijiet għall-approċċi innovattivi u sostenibbli tagħhom għall-ġestjoni tar-riskji relatati mad-diġitalizzazzjoni tax-xogħol. Ir-rebbieħa huma parti mill-Kampanja dwar Postijiet tax-Xogħol li Jġibu ’l Quddiem is-Saħħa 2023-25 “Xogħol sigur u li jġib ’il quddiem is-saħħa fl-era diġitali”. Dawn il-kampanji ta’ sensibilizzazzjoni, li ilhom għaddejjin mis-sena 2000, issa saru l-akbar tax-xorta tagħhom fid-dinja.

Ir-rebbieħa jipprovdu ispirazzjoni għall-postijiet tax-xogħol

Eni Cyprus Ltd topera fl-industrija taż-żejt u tal-gass. Żviluppat applikazzjoni mobbli u web faċli biex tintuża biex tappoġġa l-konformità mar-rekwiżiti tas-saħħa u s-sigurtà fuq il-post tax-xogħol li huma partikolarment vitali f’dan is-settur b’riskju għoli. L-applikazzjoni mobbli u web tinkludi lista ta’ verifika għal kull kompitu tax-xogħol speċifiku u tidentifika sinjali dgħajfa ta’ riskji potenzjali. Dan jippermetti approċċ prattiku għat-titjib tal-OSH.
L-Organizzazzjoni tat-Telekomunikazzjoni tal-Greċja integrat teknoloġiji ġodda u għodod diġitali bħal droni u sistemi ta’ taħriġ tar-realtà virtwali fl-inizjattivi tagħha dwar is-sigurtà, is-saħħa u l-benesseri fl-unitajiet operazzjonali kollha tagħha. Id-droni jtejbu s-sigurtà fl-istazzjonijiet bażi u r-realtà virtwali tipprovdi taħriġ f’rispons ta’ emerġenza.
Midleton Distillery, Irish Distillers Pernod-Ricard investiet f’robot mobbli awtonomu b’viżjoni tal-IA biex jiġi mminimizzat l-immaniġġar manwali meta jinħattu l-btieti. Dan naqqas ir-riskju ta’ disturbi muskoloskeletali u inċidenti fuq il-post tax-xogħol. Il-metodu ta’ ħatt tal-btieti ra tnaqqis ta’ 100 % fl-inċidenti.
Il-fabbrika tal-inbid Perla del Garda mill-Italja introduċiet teknoloġija tas-sewqan awtomatizzat b’karatteristiċi avvanzati ta’ sigurtà fit-tratturi tagħha, li tgħin biex jiġu pprevenuti korrimenti u inċidenti mis-sewwieq. Billi jsuq lilu nnifsu, it-trattur inaqqas l-istress u jippermetti li l-operaturi jikkonċentraw fuq l-għodod. It-teknoloġija twissi minnufih lill-operaturi dwar ostakli u perikli potenzjali.
Amarsul S.A., kumpanija Portugiża fis-settur tal-immaniġġjar tal-iskart solidu, adottat teknoloġiji bħal sensuri u apparati li jintlibsu biex timmonitorja s-sigurtà u s-saħħa tal-ħaddiema tagħha u tinfurmahom dwar riskji potenzjali, u b’hekk jiġu evitati inċidenti serji. Pereżempju, l-apparati li jintlibsu jwissu minnufih lill-persunal tas-sigurtà biex jitolbu assistenza medika meta ħaddiem ikun immobilizzat.
Jacar Montajes, S.L. hija kumpanija tal-kostruzzjoni Spanjola li applikat għodod diġitali bħal brazzuletti intelliġenti biex jipprevjeni puplesiji tas-sħana billi jwissu lill-ħaddiema meta jkun hemm żieda fit-temperatura ta’ ġisimhom. Il-ħaddiema kienu mgħammra wkoll b’xedd protettiv tal-għajnejn u lbies protettiv, u kellhom aċċess għall-arja kundizzjonata, għall-ilma kiesaħ u għall-protezzjoni mix-xemx fil-barrakki tax-xogħol.

Aqra aktar dwar il-Kampanja dwar Postijiet tax-Xogħol li Jġibu ’l Quddiem is-Saħħa 2023–25 “Xogħol sigur u li jġib’ il quddiem is-saħħa fl-era diġitali” u r-rebbieħa.

Aqra aktar:

Il-Jiem Ewropej tal-Impjiegi

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Il-Bażi tad-Data tal-Impjiegital-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

Il-EURES fuq Facebook

Il-EURES fuq X

Il-EURES fuq LinkedIn